Template:Featured text
From Estrepeya
CAPÍTULU I
El cualu trata al tentu la condición i el eherciciu del iargu de nombrería Don Quihoti la Mancha
Nun lugal la Mancha el cuyu nombri nu me peta recueldal, nu hadi tiempu abondu que vivía un iargu desus de lanza n'estilleru, escuu duguañoti, hacu cárcavu i gutu chutaol. Un poti de mas vaca que rincoyu*, mohi cuasi tolas nochis, salmorehu de escurriahas los sabaus, lentehas* los vienris, i angunu pombinu itó los domingus s'embuchaban seis cuarteronis la su fincaliá. El restu d'ella díbaseli nun jatu de güena caliá, carcihu de velluu* pa las fiestas colas sus pargatas de lo mesmu i a diariu hateaba fachendosu el su vellorí de más pelitasqui. Había ena su casa una guardesa* que pasaba los cuarenta i una sobrina* que nu llegaba a los veinti, i un mozinu de campu i praza qu'endigual que enhormaba el hacu asina agarraba la podona. Roceaba la eá del muestru iargu los cincuenta añus, era de cuelpu reciu, secarón de carnis*, esnutu de hocicu, gran tempraneru i collazu la caza. Angunus hucheábanli Quijá o Quesá (pus velaquí que ain angunas deferencias entri los autoris que desti chascu describin) inque pol pensaerus creyibris se hadi que hucheábasi Quihana. Ara que estu emporta pocu al muestru cuentu; es bastanti conqui ena su narración nu vaigasi lehotis ni un pelu de la verdá.
