Pelegrinage

From Renascentia

Ritorno


Contents

[edit] Le Pelegrinage de Christiano

Conto allegoric de John Bunyan in le similitude de un sonio traducite in Interlingua per Paolo Castellina, pastor evangelic (1994)

[edit] Introduction

"Le pelegrinage de Christiano (The Pilgrim's Progress) es un libro que, in le 300 annos de su existentia, ha transversate multe de ille barrieras de racia e de cultura que solitemente servi a limitar le barrieras communicative de un obra classic. Illo mesmo penetrava in le mundo non-christian; illo ha essite lecte per culte musulmanes durante le surger del individualismo religiose del Islam e, in le mesme tempore in editiones missionari a bon mercato de indianos american e habitantes del insulas meridional de nostre globo. "Le pelegrinage de Christiano ha essite definite "Le plus popular obra de spiritualitate christian usque nunc scripte in anglese. Illo es un conto allegoric que dramatisa le experientia spiritual christian evangelic per le medio de un viage o cerca. Illo es de facto un motivo typic del historia biblic (le saga de Abraham e del Exodo), insimul a su interpretationes in le Nove Testamento, de cuje ethos John Bunyan esseva permeate.

Le stilo de iste obra esseva influentiate (como le autor ipse admitteva) per le legendas e sagas popular que ille habeva lecte durante su juventute, con un realismo acutemente observate si ben psychologic como substantial. Pro John Bunyan su obra allegoric fictive non esseva un fin a se ipse, ma un medio pro facer de cata lector un "viagiator sur le via que conduce al "Canaan celeste que, quanquam illo remane aperte a omne persona de fide, curre necessemente per le deserto de iste mundo, con su vicissitudes, incertitudes e complexitates moral.

Paolo Castellina

[edit] Le vita de John Bunyan

Le documentos indica que in 1628, in le remote village anglese de Elstow, apud Bedford, nasceva 19 infantes. Uno de istos, le filio de un latonero o caldierero, esseva destinate a devenir le autor de un libro que ha ganiate un fama illimitate e que esseva traducite in multe linguas. Grande parte de iste libro habeva essite scripte in un prision! On supponeva in le 17. seculo que le position social de un persona debeva necessarimente esser illo de su parentes. Frequentemente le filios sequeva le passos de lor patre in lor profession. Non surprende, ergo, que le juvene Bunyan deveniva un caldierero un fornitor viagiante le qual reparava utensiles e instrumentos.

Un filio de caldierero habeva opportunitates professional limitate. Plus tarde Bunyan notava que: "Deo se complaceva poner in lor corde (su parentes) le desiro que lor filio apprendeva sia le lectura sia le scriptura. Iste education, ille remarcava, esseva "al nivello del altere filios de povre homines (illo es un education minimal). Ille addeva: "Io tosto perdeva le poco que io apprendeva. Su 16. anno, 1644, esseva un turbulente anno de cambio. Primo, su matre moriva e, intra un mense, su soror Margareth alsi moriva; inde, un mense post le morte de su soror, su patre se maritava de novo. Post iste commotion emotive, John Bunyan assereva que ille habeva "poc concurrentes... sia in maledicer, sia in objurgar, sia in mentir, sia in blasphemar le sancte nomine de Deo. Quando arrivava recrutatores plus tarde ille anno pro le Armea Parlamentari (o Roundheads), le juvene Bunyan esseva alacre a responder. Ille passava in ille armea le sequente tres annos durante que illo esseva implicate in le conflicto con le fortias del Rege Carolo I. Bunyan mentionava poco ille annos in le servicio militar. Le experientia, tamen, que pare haber habite un profunde impacto super ille, esseva un quasi-incontro con le morte.

Un altere soldato requireva occupar le placia de Bunyan al ultime momento in un assedio. On pote imaginar quanto grande esseva le choc quando, post le battalia, ille apprendeva que su substituto habeva fatalmente essite occise. Depost su dimission del armea, le Bunyan de 19 annos retornava a su native Elstow, ubi ille se ingagiava in le vita del caldierero. Alora, post un anno o duo, ille se maritava con Mary. "Nos conveniva insimul tanto povre quanto solmente le povres pote esser, ille affirmava, "nostre utensiles domestic se limitava a un platto e a un coclear a usar in commun.

Su vita spiritual, durante le quatro annos sequente le maritage, habeva le characteres de un sede pendular periodos de calma, accessos de depression, tentativa de reformation e un profunde sentimento de peccato e de judicamento. In reguardar retro a ille periodo turbulente, ille plus tarde videva le ration de ille experientia disordinate: "Pro iste ration io jaceva tanto longemente al Sinai a vider su foco, su nube e su obscuritate que io poterea timer le Senior tote le dies de mi vita sur le terra, e contar in re su obras meraviliose a mi infantes. Le lumine comenciava surger pro Bunyan quando, in su viages per le proxime Bedford, ille audiva casualmente le conversation de "tres o quatro povre feminas... qui sedeva al porta, sub le radios del sol, e qui parlava del cosas de Deo. Illas, a su tempore, introduceva Bunyan a lor pastor, John Gifford, al qual Bunyan constantemente se referera como "le sancte sr. Gifford. Un altere instrumento pro su conversion esseva le lectura del "Commentario a Galatas de Martin Luther. Le lumine vermente habeva surgite, e le nove converso se alineava con le ecclesia de Bedford, cuje pastor esseva Gifford. Quanquam baptisate per immersion e convincite baptista, Bunyan resolutemente refusava esser sectari. Al termino de su vita ille gaudeva le communion de christianos qui faceva abstraction de qualcunque affiliation denominational. Circa in 1655 Bunyan se transfereva con su uxor, su filia cec, Mary, e tres altere infantes a Bedford pro esser proxime al ecclesia in le qual ille esseva un ardente membro e diacono. Iste transferimento, tamen, esseva obscurate per le morte de su sposa, Mary, le qual, infatigabilemente le habeva incoragiate e consolate durante su annos de conflicto spiritual. Nonobstante iste tragedia e pois le morte de su amate pastor e monitor, "le sancte sr. Gifford (1), le caldierero deveniva un partisano inconditional del ecclesia de Bedford e un fortia trahente in le ecclesias del region. Ben que ille non esseva un predicator ordinate, on le habeva demandate in 1655 parlar a congregationes in le area. Al grande surprisa de totes, includite Bunyan ipse, le caldierero se revelava un predicator potente.

Tosto turbas de gente se congregava quando on annunciava le venita de Bunyan a predicar. Su proprie investigationes in le Scripturas e annos de lucta interior le habeva rendite un compatiente e potente guida pro alteres. Con un dependentia infantil de Deo, ille predicava, secundo su proprie parolas "lo que io vivemente sentiva. Un cambio politic, tamen, debeva interrumper su vita. Quando Cromwell moriva in 1658, Carolo 2e esseva portate retro in Anglaterra. Con le retorno del governamento royal in 1660, le libertate religiose del non-anglicanos esseva fortemente restricte. Bunyan, con altere predicatores qui habeva gaudite del libertate religiose, habeva devenite virtualmente predicatores "subterranee le quales teneva incontros in casas, stabulos e locos insulate al aere libere.

In novembre de 1660, Bunyan se preparava predicar in uno de iste congregationes in un ferma. Alcun su amicos apprendeva que un mandato pro su arresto habeva essite promulgate e le exhortava a non predicar. "Pro isto ni io me agitara, ni io dimittera le reunion, ille declarava, "Veni, sia tranquille! Vamos non esser intimidate. Nostre causa es bon (4), ille continuava, "nos non debe haber vergonia; predicar le Parola de Deo es un obra tanto bon que nos essera remunerate pro isto, mesmo si nos debera suffrer. Le predicator esseva arrestate. Quando ille refusava de cessar omne activitate de predication si ille haberea essite liberate, ille esseva imprisionate. "Io conservava mi pace e, sia benedicte le Senior, io vadeva in prision con le conforto de Deo in mi povre anima, ille commentava. Justo ante su imprisionamento ille se habeva maritate le secunde vice. Le nomine de su nove sposa esseva Elizabeth, le qual debeva esser su loyal partenaria durante ille annos de imprisionamento, como alsi matre de su infantes.

Ante ille stava 12 annos de imprisionamento, separation de su amates e un freno a su ministerio public. Ille repulsava omne offerta de liberation sub le condition de cessation del predication. "Si hodie io esseva foras del prision, io predicarea le Evangelio deman, con le adjuta de Deo, ille diceva al judice. Con se in prision ille portava su Biblia e un copia de "Le Libro del Martyres de Foxe. Pro ille le Scripturas in prision deveniva vivente. "Io nunquam como nunc in tote mi vita habeva un tal introspection in le Parola de Deo, ille assereva, "passages del Scriptura in le quales io non videva alco usque nunc, ora in iste placia brilla super me. Mesmo Jesus Christo nunc es pro me plus real e apparente que unquam antea. Hic io sin dubita le videva e sentiva. In prision ille deveniva virtualmente le cappellano de altere predicatores e companiones christian le quales alsi habeva essite incarcerate. Ibi ille mesmo produceva dentella, le qual ille vendeva pro provider nutrimento pro su familia. Alcun del sermones que ille predicava in prision probabilemente deveniva le base pro libros que esseva publicate durante iste tempore. Le plus cognite de iste libros esseva: "Gratia que abunda pro le chef del peccatores.

In ille 12 annos, de 1660 a su liberation in 1672, ille scribeva cinque libros e multe tractatos controversial e doctrinal, le quales le rendeva famose inter christianos anglese. Bunyan esseva liberate durante un relaxamento del oppression religiose in 1672. Plure menses ante su disincarceration, le ecclesia de Bedford le appellava a devenir su pastor. Integre turbas se congregava pro audir le ex-prisionero le qual esseva considerate como "Episcopo Bunyan in le tote region. Multe ecclesias, mesmo in London, requireva ardorosemente le caldierero-predicator. Le climate politic e religiose de Anglaterra cambiava tamen rapidemente ancora in 1675. Bunyan esseva de novo imprisionate per sex menses, e il esseva durante iste imprisionamento que ille scribeva "Le Pelegrinage de Christiano. Le expression de apertura de iste classico religiose revela su placia de origine: "Durante que io ambulava per le deserto de iste mundo, io perveniva a un certe loco, ubi il habeva un cava [le prision de Bedford]. Hic io me addormiva e habeva un sonio.

Le libro, que describe vividemente le viage de pelegrino ab le Citate de Destruction al Citate del Celo, ha essite acclamate como un potente, introspective reporto de conviction de peccato, conversion, lucta spiritual, proba, crescentia e retorno al casa del Celo. Alcun christianos de su tempore habeva consiliate a Bunyan non publicar le libro, proque illo es un allegoria e non directe theologia! Multitudines desde tunc, tamen, ha essite grate que Bunyan habeva ignorate iste criticos. Quando Bunyan esseva disincarcerate de su secunde imprisionamento, ille retornava a su congregation e placia de commando. In 1678 ille completava e publicava "Le Pelegrinage de Christiano. Le libro esseva instantaneemente un best-seller. In le prime anno esseva publicate tres editiones. Desde tunc illo ha essite republicate in decenas de linguas e illo ha grandemente influite sur multitudines. Le ultime 10 annos del vita de Bunyan, a sequer le publication de su opera prime, ille passava in incessante labor pro Christo.

Bunyan esseva estimate como un potente predicator, e turbas conveniva a audir le. Un vice le rege Carolo 2e demandava al erudito John Owen como poteva ille vader audir un simplice caldierero-predicator. Owen, le qual habeva essite vice-cancellero del universitate de Oxford promptemente respondeva que ille haberea de bon voluntate excambiate su sapientia con le poter de ille caldierero de tanger le cordes human. In ille annos plus que 30 libros flueva de su penna. Includite in illo esseva etiam le secunde parte del "Pelegrinage de Christiano, le qual describe le fugita del sposa de Christiano, i.e. Christina, e de lor infantes del Destruction. "Le Guerra Sancte, publicate in 1682, esseva alsi un allegoria, un description potente del vita christian contate in terminos militar.

In le estate de 1688 Bunyan esseva invitate a predicar in London. Ante quitar Bedford, tamen, ille esseva avicinate per un juvene homine, le qual habeva essite repudiate per su patre. Ille habeva exhortate le predicator de intervenir in su favor con su patre. In profitar del occasion, Bunyan ha exportate le Evangelio a iste juvene homine e ergo ille le accompaniava al domo de su patre ubi le patre se reconciliava con su filio. Alora, in un forte tempesta, Bunyan se preparava a attinger London pro su appunctamento. Iste exposition e effortio le debilitava. Quanquam ille predicava durante le servicio divin, ille obviemente esseva malade. Multe dies sequeva in le quales ille luctava contra pneumonia, e durante ille dies ille experiva pro se mesme le retorno a casa que ille habeva descripte pro Christiano e su companion, Sperantiose: "Alora veniva pro incontrar les plure Trompetteros del Rege, con vestes blanc, le quales, con sonos forte e melodiose, faceva echoar mesmo le celo con lor sonos. Iste trompetteros salutava Christiano e su companion con dece milles Benvenitas ab le mundo, e isto illes faceva con critos e con le sono del trompas.

NOTAS

(1) De "The Life of John Bunyan, paperback edition, 1977, Baker Book House, Gran Rapids, Michigan.

(2) De "Encyclopedia Britannica, Vol. 4, 1966, Chicago, Illinois.

(3) De "John Bunyan: His Life, Time and Work, by John Brown, The Hulbert Publishig Company, London, England, 1928.

(4) De "John Bunyan, by Gwylim O.Griffith, Doubleday Company, New York, 1928.

(5) De "They Found the Secret, by W. Raymond Edman, 1960, Zondervan, Grand Rapids, Michigan.

(6) Cf. "John Bunyan by Gwylim O. Griffith, Doubleday Company Inc., New York, 1928.

(7) De "The Pilgrim's Progress From This World to That Which is to Come, by John Bunyan, The Banner of Truth Thrust, Edimbourgh, Scotland, and Carlisle, Pennsylvania.

[edit] Tabula del contento

  • 1. Conviction de peccato
  • 2. Christiano e Evangelista
  • 3. Obstinato i Plicabile
  • 4. Le Palude del Discoragiamento
  • 5. Adjutas
  • 6. Sr. Sapientia mundan
  • 7. Christiano e le deception del Alte Colle
  • 8. Le Porta Stricte
  • 9. Bon Voluntate
  • 10. Le casa del Interprete
  • 11. Le Cruce que salva
  • 12. Tres homines dormiente
  • 13. Formalista e Hypocrisia
  • 14. Le tres stratas
  • 15. Un agradabile refugio
  • 16. Diffidentia e Timorose
  • 17. Le Casa Belle
  • 18. Le Conversation con le tres juvene feminas
  • 19. Le Cena in le Casa Belle
  • 20. Le documentos del Casa belle
  • 21. Multe altere meravilias a vider
  • 22. Christiano se prepara a partir
  • 23. Christiano affronta Apollyon
  • 24. Le Vallea del Umbra del Monte
  • 25. Fidel
  • 26. Incontro con Loquace
  • 27. Nove incontro con Evangelista e su premonition
  • 28. Le Feria del Vanitate
  • 29. Le processo contra Fidel
  • 30. Sperante
  • 31. Incontro con Interessose
  • 32. Discurso in re un religion commode
  • 33. Le colle del lucro
  • 34. Un estranie monumento
  • 35. Le agradabile riviera
  • 36. Le periculose via plus confortabile
  • 37. Le castello del dubita
  • 38. Le Montes Delectabile
  • 39. Le Montania del Error
  • 40. Le Monte Prudentia
  • 41. Un porta del inferno
  • 42. Le telescopio
  • 43. Ignorantia
  • 44. Aversion, le apostata
  • 45. Parvefide
  • 46. Le adulator
  • 47. Atheista
  • 48. Le terreno incantate
  • 49. Nove incontro con Ignorantia
  • 50. Discurso super le timor de Deo
  • 51. Temporario
  • 52. Le pais de Beulah
  • 53. Le Fluvio del Morte
Personal tools